MANISPAA YA SINGIDA YAFANIKIWA KUFUTA ALAMA NYEKUNDU KATIKA AFUA ZA LISHE

Posted on: April 29th, 2023

Manispaa ya Singida katika robo ya tatu ( Januari- Machi) 2023 imefanikiwa kufuta alama nyekundu katika afua ya lishe pamoja na kwamba mila na desturi katika baadhi ya maeneo bado ni changamoto.

Afisa Lishe wa Manispaa ya Singida, Isaac Maseri amebainisha hayo katika kikao cha robo ya tatu  cha Kamati ya lishe ya Manispaa, ambapo amesema Halmashauri imepiga hatua katika masuala ya lishe  kwa elimu kutolewa katika kata zote licha ya changamoto katika mapokeo ya elimu hii kwa jamii.

Akizungumzia kuhusu mpango wa utoaji chakula shuleni, Afisa huyo amesema kuwa , kati ya kata 18 za Manispaa ya Singida kata 16 zimefanikisha mpango wa utoaji chakula shuleni na kwamba kata mbili bado hazijatekeleza.

Maseri amesema  utoaji chakula kwa wanafunzi ni muhimu kwani mwanafunzi akipata chakula anakuwa na utulivu wa akili na hivyo kuongeza usikivu wakati wa masomo.

“ hali ya lishe katika halmashauri yetu inaridhisha ukilinganisha na miaka ya nyuma…..robo hii ya tatu tumeweza kuondoa alama nyekundu katika afua ya lishe ….tumeongeza idadi ya shule zinazotoa chakula shuleni” amesema Maseri.

Aidha amesisitizia suala la lishe kufanywa agenda katika kila kikao lengo likiwa kuiwezesha Halmashauri kuondokana na tatizo la utapiamlo kwa watoto na kuitaka jamii kutumia vyakula vinavyopatikana katika maeneo yao ili kupata mlo kamili kama vile mboga mbalimbali za majani, maharage na mboga za jamii ya mikunde.

Naye Mkuu wa Idara ya Mipango na Uratibu, Jeremiah Kikonge, ambaye alimwakilisha Mkurugenzi wa Manispaa katika kikao hicho, ameipongeza kamati hiyo kwa kupiga hatua katika masuala ya lishe na kuwataka wajumbe kufanyia kazi makubaliano yanayofikiwa  ili kufikia lengo kusudiwa.

Amesema utoaji chakula shuleni sio ombi ni agizo la kuhakikisha watoto wanapata chakula ili kuwajenga kiakili  na hivyo kuongeza ufaulu, kupunguza utoro lakini kubwa kumfanya mtoto kupenda shule. Pia amezitaka kata ambazo hazijakamilisha mpango huo , kuhakikisha wanautekeleza kabla ya kikao cha robo ya nne, 2023

Katika kikao cha wadau wa elimu kilichofanyika Aprili 27, 2023 Mkoani Singida, Mkuu wa Mkoa wa Singida Peter Serukamba aliwaagiza wakurugenzi kuhakikisha lengo la utoaji huduma ya chakula shuleni linatekelezwa katika shule zote katika halmashauri zao.

Rais wa Jamhuri ya Muungano wa Tanzania Dkt. Samia Suluhu Hassan alisaini mkataba wa lishe Septemba, 30, 2022, mkataba ambao ulitanguliwa na mikata mingne miwili wa Desemba 2017 na  na Agost, 2021 yote kwa pamoja ikihimiza usimamizi wa afua ya lishe.