MSTAHIKI MEYA WA HALMASHAURI YA MANISPAA YA SINGIDA AHIMIZA UMAKINI KATIKA UKUSANYAJI MAPATO

Posted on: June 22nd, 2021

Mstahiki Meya wa Halmashauri ya Manispaa ya Singida Mhe. Yagi Kiaratu, amewataka wakuu wa idara na vitengo katika halmashauri hiyo kusimamia ipasavyo vyanzo vya mapato na kuhakikisha kuwa hakuna fedha itakayotumika nje  ya mfumo.

Mhe. Yagi ameyasema hayo wakati akihitimisha kikao cha kawaida cha kamati ya Fedha na Utawala na kuweka msisitizo juu ya utumiaji wa fedha nje ya mfumo kuwa ni kinyume cha taratibu.

 “Ninawatahadharisha suala la kutumia fedha mbichi ( Nje ya Mfumo) sitalivumilia, fedha zote zikusanywe na kuwasilishwa bank” amesema Mh. Yagi

Aidha amewataka wakuu wa idara na vitengo katika Manispaa ya Singida kuwa wabunifu katika suala la mapato ili kuinua asilimia za ukusanyaji mapato. Amesema ni vyema wakuu hao wa Idara na Vitengo kukaa na kujitathmini endapo wanatosha katika nafasi zao au la na kwamba hizi sio nyakati za kuoneana aibu.

Halmashauri ya Manispaa ya Singida katika kuhakikisha inafikia asilimia 80 za ukusanyaji wa mapato, imeunda timu za kusimamia vyanzo vya mapato ambapo kila mkuu wa idara na kitengo ana chanzo cha kusimamia  ili kuhakikisha mapato hayapotei.