NIC kuimarisha huduma za bima Mkoa wa Singida

Posted on: October 27th, 2025

Mkurugenzi Mtendaji wa Shirika la Bima la Taifa (NIC), Bw. Kaimu Abdi Mkeyenge, ameendelea na ziara yake ya kikazi katika mikoa ya kanda ya kati (Singida) kwa lengo la kuimarisha uhusiano wa kibiashara na wadau mbalimbali.

Katika ziara yake Bw. Mkeyenge amekutana na kufanya mazungumzo na Mkurugenzi wa Halmashauri ya Manispaa ya Singida Bi Joanfaith Katarai, Bw. Mkeyenge ameelezea namna NIC inavyoweza kutoa huduma za bima kwenye miradi ya kimkakati ili kuwezesha Halmashauri kukusanya mapato bila kuwa na wasiwasi endapo janga litatokea. @joanfaithkataraia ameipongeza NIC kwa kuendelea kuimarisha na utoaji huduma za bima kwa wananchi na taasisi mbalimbali.

Bw. Mkeyenge ameleza kuwa NIC “Tumeendelea kutoa elimu kwa viongozi mbalimbali kuhakikisha wanakata bima kwenye miradi yao kama majengo na masoko yanayojengwa, kwa sasa tumeona namna masoko yanavyoungua hii inaleta athari kwenye ukusanyaji wa mapato, lakini ungekuwa na bima ya moto sisi NIC tungelipa fidia ya janga hilo la moto” Bw. Mkeyenge

Baada ya kukutana na Mkurugenzi wa Halmashauri ya Manispaa ya Singida Bw. Mkeyenge aliendelea na ziara kwa kuwatembelea wadau wa sekta ya fedha benki ya @tanzaniacommercialbank na @nmbtanzania ambao ni benki wakala wa bima.

Bw. Mkeyenge amewataka mameneja wa benki hizo kuendelea kushirikiana katika utoaji wa huduma za bima kwa wananchi wakitambua umuhimu wa kila moja katika kukuza sekta ya fedha nchini.

“Ninapokusanya ada za bima natakiwa kuwekeza sehemu mbalimbali ikiwemo kwenye benki za kibiashara ndiyo uchumi unavyokuwa kwa pamoja, tushirikiane na kuhakikisha tunakuza sekta hii ya fedha”

Ziara ya kikazi ya Mkurugenzi Mtendaji itaendelea katika mikoa ya Tabora na Shinyanga.