VYANZO VIPYA VYA MAPATO KULETA TIJA MWAKA WA FEDHA 2023/2024

Posted on: February 2nd, 2023

Halmashauri ya Manispaa ya Singida imeibua vyanzo vipya vya mapato, vinavyotarajiwa kuanza kutumika mwaka wa fedha 2023/2024 ili kuiwezesha Manispaa kukusanya mapato na kutoa huduma bora kwa wananchi wake.

Akiwasilisha Mpango na Bajeti ya zaidi ya Shilingi Bilioni 33.4 kwa mwaka wa fedha 2023/2024, mbele ya Baraza la Madiwani, Mchumi wa Manispaa, Selestine Massawe, amevitaja vyanzo hivyo kuwa ni mradi wa matofali, uendelezaji wa vitegauchumi katika Kituo kikuu cha mabasi, ujenzi wa soko la kisasa la vitunguu, ujenzi wa maegesho ya magari makubwa lenye vitegauchumi mbalimbali ndani yake, ujenzi wa jengo la kitegauchumi eneo stendi ya zamani, vyote hivi vikitarajiwa kutoa ajira kwa wananchi wengi na hasa  vijana.

Wakitoa michango yao katika Bajeti hiyo, Baadhi ya wajumbe wa Baraza la Madiwani, wameunga mkono uanzishwaji wa mradi huo wa matofali kama chanzo kipya cha mapato ambapo wamesema, mradi huo uliotengewa kiasi cha shilingi takribani milioni 50, wenye tija kwa jamii, ni matokeo ya ziara za mafunzo walizofanya katika Halmashauri zingine, walizotembelea.

Meya wa Manispaa ya Singida, Mstahiki Yagi Kiaratu, akichangia Bajeti hiyo amesema , Bajeti ya mwaka ujao wa fedha inatoa nafuu kwa Wananchi, kutokana na  shughuli za kawaida kushushwa kutoka asilimia 60, hadi asilimia 46 kwa mwaka wa fedha 2023/2024

MKUU wa Wilaya ya Singida, Mhandisi Paskasi Muragili, akiongea katika Baraza hilo maalum la kupitisha bajeti, amepiga marufuku watoto wa umri chini ya miaka 18 kuingia kwenye maeneo yanayochezeshwa Kamari, maarufu kama ‘Play station’, kufuatia watoto wengi na vijana kufanyiwa vitendo vya udhalilishaji.

Sambamba na hilo , Muragili amewataka wale wote wanaoiendesha michezo hiyo kukata leseni, kutoka Halmashauri ya Manispaa ya Singida ili iwe rahisi kufuatilia kazi zao.

Aidha Mkuu wa Wilaya, Mhandisi Muragili amemshukuru Mheshimiwa Rais, Dkt. Samia Suluhu Hassan kwa kumwamini na kumpa nafasi nyingine ya kuitumikia serikali katika Wilaya ya Singida na kuahidi kutomwangusha kwa kuwa aiamini timu ya viongozi iliyopo na kwamba wako tayari kutekeleza majukumu na maagizo mbalimbali hasa kutekeleza Ilani ya Chama cha Mapinduzi.

Bajeti ya Mwaka ujao wa fedha 2023/2024 ya shilingi Bilioni 33.4/= imeshuka, ikilinganishwa na bajeti  ya mwaka wa fedha wa 2022/23, ya zaidi ya shilingi Bilioni 37.8, kutokana na sababu kadhaa, ikiwemo mishahara ya watumishi kwa mwaka ujao kuandaliwa kwa njia mfumo, badala ya makisio kama ilivyokuwa miaka ya nyuma.