WALIMU WA SOMO LA KIINGEREZA MANISPAA YA SINGIDA WAPIGWA MSASA

Posted on: January 23rd, 2025

Mkuu wa Idara ya Elimu ya Awali na Msingi wa Manispaa ya Singida, Bw. Omary Maje, amefungua mafunzo ya siku tatu kwa Walimu mahiri wa somo la Kiingereza kwa shule 55 za msingi za Halmashauri ya Manispaa ya Singida.

Mafunzo hayo yanatarajiwa kuwa na manufaa makubwa katika kuboresha mbinu za ufundishaji na ujifunzaji wa somo la Kiingereza, na hivyo kuchangia katika kuongeza ufaulu wa wanafunzi.

Mafunzo hayo, ambayo yalifunguliwa leo katika Shule ya Msingi Tumaini Viziwi, yanalenga kuwajengea uwezo walimu hao katika njia mbalimbali za ufundishaji zinazolenga kuongeza ufanisi katika somo la Kingereza.

Akizungumza wakati wa ufunguzi wa mafunzo hayo kwa niaba ya Mkurugenzi wa Manispaa ya Singida, Joanfaith Kataraia, Afisa Elimu Bw. Omary Maje aliwasisitiza walimu hao kuhakikisha wanazingatia mafunzo hayo kwa umakini mkubwa.

 Alisema kuwa mafunzo hayo ni chachu ya mafanikio katika ufundishaji na kuwa yatakuwa na mchango mkubwa katika mabadiliko ya ufundishaji wa somo la Kiingereza.

“Mafunzo haya yanakusudia kuona mabadiliko katika ufundishaji wa Kiingereza. Tunataka kuona walimu wanachukua hatua kwa vitendo, kwa kuandaa vifaa vya kujifunzia na kuhakikisha wanafundisha kwa ufanisi. Hivyo, ni muhimu kuhakikisha mafunzo haya yanazingatiwa kwa umakini ili tuweze kuona mabadiliko makubwa,”.

Mafunzo hayo ni sehemu ya juhudi za kuboresha ubora wa elimu katika Manispaa ya Singida, na yataendelea kwa muda wa siku tatu, huku walimu wakitarajiwa kujifunza mbinu mpya za ufundishaji wa somo la Kiingereza.