ZOEZI LA UTOAJI WA CHANJO YA MIFUGO NA UTAMBUZI WA MANISPAA YA SINGIDA

• 

  Zoezi la utambuzi, usajili na utoaji wa chanjo za mifugo limeanza rasmi katika Halmashauri ya Manispaa ya Singida, likihusisha mifugo aina ya ng’ombe, mbuzi na kondoo, ambapo wafugaji wametakiwa kuhakikisha mifugo yao inashiriki kikamilifu katika hatua hiyo muhimu kwa afya ya mifugo yao. Katika kuanza kwa zoezi hilo leo Septemba 2, 2025, zaidi ya ng’ombe 200 na mbuzi 100 wamechanjwa katika shamba la mfugaji mmoja lililopo Kata ya Unyianga, ikiwa ni sehemu ya mpango wa kuhakikisha mifugo yote katika manispaa hiyo inapata kinga dhidi ya magonjwa mbalimbali. Akizungumza wakati wa zoezi hilo, Afisa Mifugo wa Manispaa ya Singida, Bw. Benedict Bulugu, amewataka wananchi kutoa ushirikiano kwa maafisa wanaotekeleza zoezi hilo na kuhakikisha mifugo yao inafikishwa katika maeneo rasmi ya uchanjaji. “Tunaomba wananchi wajitokeze kwa wingi. Chanjo hizi ni muhimu kwa ajili ya afya ya mifugo yao na zitasaidia kudhibiti milipuko ya magonjwa hatari kwa mifugo kama vile homa ya mapafu ,” alisema Bw. Bulugu. Zoezi hilo linatarajiwa kufanyika katika kata zote 18 za Manispaa ya Singida kwa lengo la kuchanja jumla ya ng’ombe 32,000 na mbuzi 21,000, sambamba na kufanya utambuzi na usajili wa mifugo hiyo. Halmashauri ya Manispaa ya Singida imesisitiza kuwa zoezi hilo ni sehemu ya mkakati wa kitaifa wa kuimarisha afya ya mifugo na kurahisisha upatikanaji wa takwimu sahihi zitakazosaidia katika kupanga maendeleo ya sekta ya mifugo. Kwa mujibu wa Afisa huyo, ratiba ya uchanjaji itatangazwa kwa kila kata, na wananchi wanashauriwa kufuatilia kwa karibu taarifa hizo kupitia viongozi wa vijiji na kata pamoja na maafisa mifugo waliopo katika maeneo yao.